分析观点

今個禮拜四深夜，今季歐協聯決賽打響，貝迪斯同車路士將在波蘭的樂斯拉夫市立球場一決高下。貝迪斯期待贏得隊史首個歐戰獎盃，而車路士亦渴望實現歐戰全滿貫，無容置疑，今場兩隊士氣都十分高漲。 貝迪斯陣中有多達4位球員在今屆歐協聯當中，為球隊貢獻2球或以上，進攻端可以話火力全開。在曼聯鬱鬱不得志的巴西翼鋒安東尼.馬圖斯冬窗租借加盟球隊後，猶如打通任督二脈，西甲加埋歐協聯出賽25次，射入9球兼夾送上5次助攻，如此表現亦都令到佢順理成章重返巴西國家隊；與此同時，球隊中場伊斯高亦時隔6年重返西班牙國家隊，信心大增，今場動力十足。球隊即管進攻表現出色，連續20場正式比賽有入波，但近5場賽事失10球，球隊防守認真甩漏；中堅迪亞高.洛蘭迪、右閘赫達.比拿連以及防中馬克.洛卡今場仍需因傷倦勤，貝迪斯恐怕難敵車仔鋒線衝擊。 車路士歐協聯幾乎出晒副選咁滯，但分組賽6場全勝，連隨又淘汰哥本哈根、歷基亞同埋佐加頓斯三隊非五大聯賽球會晉級，入到決賽成個過程都几順攤。球隊今季英超亦算完成任務，成功爭到來季歐冠聯席位，並且陣中無傷病乜滯，今場可出齊正選應戰。近10場各項賽事，車路士共射入16球，而今季歐協聯球隊場均亦都能夠入3.16球，車仔進攻火力同樣非同小可；中場方面，摩西斯.卡些度夠晒掗拃，安素.費南迪斯零舍鍾意放長波搵身前的高爾.彭馬以及箭頭人物尼古拉斯.積臣，如此套路對住鐘意控波的貝迪斯，可能會揾到著數，車仔反擊機會可能都會多籮籮。 兩隊今屆賽事進攻線都打出了恐怖的數據，貝迪斯中後場傷病情況較為嚴重，而英格蘭球隊過往9次響歐戰決賽當中遇著西班牙球隊，法定時間都未能贏波，車仔都被這一魔咒困擾住，今場贏波都並非話咁易；貝迪斯亦有能力威脅車仔後防，今場賽事預期會出現一場入波盛宴。